Prizen en it krúske
Koestere bewiis fan in unike sportprestaasje
It Alvestêdekrúske
Elke dielnimmer, dy’tbinnen de stelde tiid* de wedstryd of tocht ta in goed ein bringt en alle stimpels sammele hat, ûntfangt it fûl begearde Alvestêdekrúske. It krúske is ûntwurpen yn 1909. It bestiet út in medalje yn de foarm fan in Maltezer krús mei yn it midden in sirkelfoarm. Dizze sirkel befettet, yn emalje, it wapen fan Fryslân. Yn it opskrift stiet ‘de Fryske Alve Stêden’. Yn 2009 hat de feriening it predikaat ‘keninklik’ krigen en is it krúske oanpast, sadat ek it keninklik kroantsje sichtber is. Dizze keninklike krúskes wurde pas útrikt nei de earstfolgjende tocht.
De ôfbylding fan it Alvestêdekrúske, it logo, de flagge en de namme (Keninklike) feriening De Fryske Alve Stêden binne beskerme en meie net sûnder tastimming fan de feriening troch tredden brûkt wurde of eksploitearre.
Prizen wedstriid
Njonken it krúske is der foar de alve earst oankommende manlju en de alve earst oankommende froulju ek in medalje. De winner by de mannen ûntfangt boppedat de Pim Mulier-wikselpriis: in grutte sulveren skûtel. De winner by de froulju kriget twa wikselprizen: in sulveren bokaal, en ek in sulveren wikselbeker. Sawol de manlike as de froulike winner kriget in krâns.
De nammen fan sawol de manlike, as dy fan de froulike winner, wurde ek gravearre yn it byld De Alvestêderider, dat foar de iishal (Elfstedenhal) yn Ljouwert stiet. De útrikking fan de prizen hat plak yn Ljouwert by de huldiging yn de neimiddei fan de dei dat de tocht ferriden wurdt. Alle medaljes en wikselprizen wurde tentoansteld yn it Fries Scheepvaartmuseum yn de seal De Fryske winter.
*útslutend wedstriidriders/-rydsters dy’t op syn meast 20% fan de rydtiid fan de winner/winneres ride, komme yn oanmerking foar in alvestêdekrúske. Toertochtriders/-rydsters moatte foar 00.00 oere oankomme yn Ljouwert.
